Mancomunidad de la Comarca de Pamplona

Mancomunidad de la Comarca de Pamplona

Albisteak RSS
Ibai parkea
2022/04/08

Neguko uholdeen ondorioz Ibai Pasealekuan izandako kalteak konpondu ditu IMk

Helburua da lanak Aste Santua baino lehen amaitzea, orduan emendatu egiten baitira bisitak parkean

Iruñerriko Mankomunitateak hurrengo astean amaituko ditu 2021eko abenduko eta aurtengo urtarrileko uholdeek eragindako kalteak konpontzeko Ibai Pasealekuan egin dituen obrak. Horrenbestez, pasealekua egokitzea Aste Santuaren aurretik amaituko da, ordua hasten baita parkea gehien erabiltzen den denboraldia.
 
Hiri-eremuan sortu ziren kalte nagusiek hauei eragin zieten: Burlatako eta Atarrabiako argiteria, Donapeko (Atarrabia), Orikaingo hondartzako eta Arreko eremuko haurrentzako jokoen guneak, txakurrak aske ibiltzeko guneak, eta hesiak parke osoko zati desberdinetan. Hilabete hauetan Iruñerriko Mankomunitatea gogor aritu da lanean, hondatutako gune horiek lehengoratzeko.
 
Landa-eremuan, Oltza udalerriko inguruneak hartu zuen kalte handiena (Arazuri / Barañain, Ororbia eta Ibero). Hain zuzen, duela urte bat eskas inauguratu zen zati batean bide-zoruari eragin zion, uraren indarraren ondorioz, zati batean herrestan eraman baitzuen. Hortaz, zoladura saneatzeko eta berriro jartzeko lanak egin behar izan dira.
 
Halaber, ibaia handitzean herrestan eraman ziren hondakinak aipatu behar dira, gero parke osoan zehar gelditu zirenak, Esteribar eta Ezkabartetik Oltza Zendearaino. Hondakin horiek biltzeko, Ibai Parkeko mantentze-taldearen lanaz gain, herritarren laguntza nabarmendu behar da. Bi boluntariotza-saio edo auzolan antolatu ziren, ukitutako udal guztiekin koordinatuta. Saio horiek otsailaren 26an (Arga Garaia eta Ultzama) eta martxoaren 5ean (Arga Beherea, Elortz eta Arakil) egin ziren, guztira 400 lagunek parte hartu zuten eta 9.000 kilogramo hondakin baino gehiago bildu zituzten.
 
Azkenik, parkeko toki desberdinetan kokatuta dauden erretokiak hobetzeko lanak hasi ditu IMk, eta Arazuriko HUAko konposta bota du, jolas-eremuetako lurra hobetzeko eta landaredia garatzea laguntzeko.

35 kilometroko baino gehiagoko ibai-pasealekua

Iruñerriko Ibai Pasealekua Arga, Ultzama eta Elortz ibaien ertzean dago, eta 35 kilometroko baino gehiagoko korridore berde bat da. Ipar-ekialdetik hego-mendebaldera doa, Soraurendik eta Iroztik Iberoraino. Iruñetik igarotzean, Arga ibaiak 16 kilometro gehitzen dizkio parkearen luzerari, udal-barruti horretan duen ibilbidearenak, hain zuzen. 
 
Ibai Parkeak ibaiko ekosistemak babesten ditu, eta ibilbidea eskaintzen du eskualdeko ibaiei lotutako arkitektura- eta industria-ondarearen bidez. Bizitza naturalerako babeslekua da, eta espazio irisgarria da oinezko eta txirrindularientzat, aisiarako, kirolerako eta gizarte-arloko ekitaldietarako baliatzen dena.
 

Beste albiste batzuk

  • Iruñeko Planetarioan izango dira, urriaren 19an eta 20an. Eta horiek osatzeko, konpostajeari eskainitako beste bi jardunaldi egingo dira
  • IMk 5 milioi euro jasoko ditu NEXT GENERATION funtsetatik, inbertsio hau laguntzeko
  • 400 metroko luzerako hodi berri batek Munarrizko ur-biltegia Goñikoarekin konektatu du